ہن جݩگلَن اُوڵے ہَن شیرَن بِم۔ دا گُنزِکِیࣷ  جاندارِشواِݜکرنوۡت ݜُوݜُو بِم، ہو ڎے جاندارِشوگٹی نُمہ سݩاسݩ نیࣷت گُتے بر یٹےایسکرڎیࣷن کہ میࣷ سہف ہن نِمِماࣷ شیر ایࣷپچہ ڎھیࣷران، دا سےانݩگا برِݩ ایࣷچن۔

ہو ڎےࣷ سوْ گٹی نُماࣷ شیر ایࣷپَچاࣷ گلیࣷن، دا شیرِݩاࣷ اکھی برِݩ ایࣷتیࣷن کاࣷ اکھوئݩ ڎُم میࣷ گوࣷغاࣷ قلݩ چکیࣷݜ ایࣷچن دا گنزِکی ہن ہن جاندار گو ہاڵہ ڎھُرِمیࣷ دا سے گو گُنزُم گُغرِکیࣷ میِمیࣷ۔ مگم میࣷ اِݜقلی گُتے کاࣷ ان گُیاࣷ می اِݜکر ائی میࣷچُما۔ بٹ دوࣷہوࣷن دوࣷہوࣷن گُتے بر یٹے شیرے اواࣷ سیࣷنی۔ ہو ڎےࣷ جاندارےࣷ بریࣷنژ نُپِشاࣷ امیࣷس جاندارےࣷ ییࣷک دُوسیࣷ کاࣷ ، سے اِیاࣷ نُکُڎھر شیرےࣷ ہاڵاࣷ گلیࣷ کاࣷ ہوࣷ سےࣷ شیرےࣷ سےࣷ ݜِی ݜِی بِم۔ ہن سا بریࣷنژ ہن ہوشیار(اُچُتوࣷ) سرَناࣷ دُوسیࣷ، ہوࣷ سےࣷ سرےࣷ، ڎےࣷ جاندارِشو غاࣷ سیࣷنیࣷ کاࣷ اکھوئیݩ خدائے جَغاࣷ ہن پھنزن اسکی آتُمبئی ، خدائے رائے ایࣷتِکاࣷ جاࣷ سےࣷ شیر ڎُم ماࣷ کاࣷ خلاص مچَم۔ ہوࣷ ڎےࣷ جاندارِشو دیࣷغریࣷسیࣷن کاࣷ می غاࣷ کاࣷ سیࣷنا.

سِیاࣷ ہوࣷ سےࣷ اُچُتوࣷ سرےࣷ سیࣷنیࣷ کاࣷ بے رازے برِݩ میناࣷکاࣷ اخَتِم بݜ، شوا سیࣷسےࣷ سیࣷنُم دُواࣷ کاࣷ بر گوخَچُم دُوسی کࣷا تِݜےࣷ ڎھُچِمیࣷ، تے گندی ماࣷ کامن دریࣷش ایتِݩ دا غانِݩ۔ ہو سےࣷ سر اِیاࣷ بہاࣷ چیࣷ ڵین نیࣷت ہُرُٹیࣷ۔ اِتیࣷ شیر څھم نِماࣷ اِݜکرکڎےࣷ نِوَڵ زمین براقِچُماࣷ دوࣷہوࣷنیࣷ، سر بلشا بلش مگم بے غم شیر ایپاچہ گلی دا شیرے سے سر نِییࣷڎ بُٹ موس نِماࣷ سیࣷنِی کاࣷ لے سار اُن اکھُرُم ملال بوتاࣷ گمنا(گُکھرناࣷ بوتاࣷ).

سِیاࣷ ہوࣷ سےࣷ سرےࣷ ہیࣷرچہ نِماࣷ سیࣷنیࣷ کاࣷ ہئی جنݩگلےࣷ بادشاہ بو سِیَم اگرجا جیࣷ بخشِندہ آچُمبا کاࣷ عُذر ایࣷچم سِیاࣷ ، شیرےࣷ سیࣷنیࣷ کاࣷ بو سِمبا ݜوۡ سیࣷن۔ تَوُرُمہ سرےࣷ سیࣷنی کاࣷ جا اکاٹ ہن تُم ترق سرآن کاࣷ بِم۔  گن اُوڵے ڎھُوراࣷ تو تُھم شیرآن روئے ڎےࣷ نِیاࣷ مِیغاࣷ چِرکنیࣷ میࣷ بٹ اِݜقلی ایࣷتیࣷن گو گُییࣷک ایࣷتیࣷن مگم سے گو سےࣷ قلݩےࣷ سےࣷ نیو سر نِغرک ڎھُوئی۔ دا سیࣷینیࣷ کاࣷ ماࣷ سےࣷ بادشا کاࣷ جاࣷ ݜِڅم ،تَوُرُماࣷ سےࣷ شیرےࣷ موس دی سیࣷینی گوۡن جغاࣷ آہلتیࣷر کاࣷ اوࣷسےࣷ چوٹِݩ جاࣷ ایچَم، ہوࣷ سےࣷ سر یر نِماࣷ ہن غوْلقوࣷسَن یٹاࣷ گلیࣷ دا اکھر ایلجاࣷ ایࣷچا۔ شیرے دوغریسی کہ بو منی بوتاࣷ اِیلجاࣷ دوࣷکوࣷیاࣷ، سے اُچُتوࣷ سرےࣷ سیࣷینیࣷ کاࣷ بادشاسلامات گوࣷ غاࣷ بو سِیَم سےࣷ شیرےࣷ گوسےࣷ قلݩےࣷ سر نِییاࣷ اکھولاࣷ نیࣷم بِم جاࣷ آمَلچمبا، اُن تےࣷ ہِرِتاࣷ نوࣷکو ژوݩ گومن کاࣷ۔ سِیاࣷ ہوࣷ سےࣷ شیر سےࣷ غوْلقوࣷساࣷ ژوݩ نِما غانِکاࣷ اُوڵےࣷ شیرَن بیࣷ ، ہوࣷ سے شیرے مخمیز نیࣷت سےࣷ شیر یٹاࣷ چِرکنی دا سے غوْلقوࣷشی دِکھٹ یُوریࣷ ۔ ہوࣷ سے سر گِراشُمے اییاࣷ ڎےࣷ کاٹ بمہ چُوࣷ اوپچہ نی مݜقلگی اوچھیئی کہ اکھوئینݩ ڎُم میࣷ سَہوے جی خلاص منی شیر غوْلقوشہ نیوشی اسقنہ،  ہو ڎے سف جانداریشو گٹی نما تماشا ایتن دا سے سرے سینی کا گوتے خدائے مہربانی ڎوم منی نے مدد ایتی۔

مولانا رومی اییا گُتے سینمولے تئی سیمبئ کہ دݜمن ایࣷسقیُمے گندی عقل کا ہمت ضرورت میُم دُواࣷ۔ دا گُتےࣷ کاࣷسِمبئی کاࣷ ہوࣷلُم دݜمن ڎُم حاڵم یعنی اُولِکلڎُم دݜمن ایࣷسقیُم بُٹ زور یا گران دُواࣷ