بروشاسکیولے پرتینݩا، نینیشترو یا گن ݜون، دا کھوار یا ملگوشاسکیولے ننگینی سیمبان۔ گُتے ہن اکِھلڎ عقیدآن دوا، کہ کھوے مخلوق مِن کہ بان کاࣷ، مینے اُلْچیࣷ ائیڎُھرمین۔ بیࣷݜ مخلوق بان، دا کھوئےاگر بو زیلی خفہ اوتین کا، ہو کھوے اُڎُم ضرر کا میوم دوا، سینا شو تئی کا سیمبان کہ کھوے سس یا مخلوق بٹ تھنُم تھنُم چھرْکوࣷ یٹے ہروچاچُمبان۔ بو زیلی ننݩا پربت یِکےچھرولے  کھوے ہوروشومے جغینݩ یا حکی چنݩ بیڎہ سیمبان۔

تِے ذَیِلی تُھم کا تَھیُو تَھیُو چَھرکو تَھنِیشی کُھوے حَکِیࣷچَݩ بِیࣷڎہ سِیمبَان۔

داکُھوے، سسے وُجُوتا یا قَلِپَا کا نُوکَی سس اوسمَلچُومبان، خاص کر گُوشِنݩا اومَلاشُومَیُومبَان، وے غہ مومَلاس سِیَامبَان۔ دا ہیرِن ایمَلاس مَنِی کا نے غہ بِٹَن سِیَمبَان ، بِٹَن یَسِنولے اَپَان۔  

چُھوشِݩ کا اُومِیࣷح: گُوکِئے اِسکِم مَیُمبِیࣷڎہ آمِیࣷک بُٹ پَھلَاش دا غُپَس ڎُوم کا پَھلَاش (پولیسٹر) جوا بُرُومِݩ جِنَارِݩ بِیࣷڎہ۔ جہ اَچوغون کُوشِیوُلے اَیا واوۡ مُکاٹ قرقلتی بَرا یا ترہ مَل حَال نُویا گَلِن کا ، ہو گَنُو،لے بیرُومَن جَغَچِی کم کَمَن چھُوشِݩ نِیَا مِییَاٹِس ڎِھے یا قَلِپ ڎِھے کھَاݜ نت یا مِلجِیوَارے پَھر پَھر نِت، عَنے مُوئیِݩ یا ݜَاوۡوَن ڎِھے یا بو کا تومتَلُو ڎِھے  تَالِیچُم ڎِک۔.

 دا پاریتِیࣷݩ یعنی گَنݜاوَن اُوہِیلِیکِم ڎِک ، لے گَن ݜَوَن ، مَدَد مَمَانِݩ، شَکر نَنِشتَرُو مہ یَٹُم نَذُر می سَہفا بو ضَرَر اَئِتِݩ، اُومِیࣷح اُومِیࣷح ، نوخہ کِئے چُھوشِݩ بوتَن ڎھیےࣷ کا اِیخَراچَچُم ڎِک۔ تے ذَیِلی اَگر دُولَسِن وَہجَم اِیتی کھِیتی نِیی مَلال مَنیࣷکا ، سِیمڎِک اُومِیࣷح اِیتِنݩ چُھوشِنݩ گِیئنݩ وَہجَم نَنِیشتَرو ڎُومَان کہ دِیشِیمن۔ یعنی گَن ݜَوَان اُوہِلیِکنِن کہ وِے اِیلجا دِیشِیمن۔

 سِیمبَان کہ  اَمبِیژِݩ اُلے دَا تَھایُو چَھرکو یَٹے نَنِیشتَرو یا گَن ݜَوَان ہُورُوچَچُمبَان۔ اگر بو ذَیِلی وِے خَفہ مَنِین کا ۔ وِے سِسَا ضَرَر اِیࣷچُمبَان، یا مِیࣷنے اِسِین یعنی دُلَس پَلَس نِییَا ڎُو چُمبَان۔ دا وِے غا اِݜقَلِی نِت اُوہِلیکِنن کا وِے بَر یایُومبَان، یعنی چُھوشِݩ نِیگی اُومِیࣷح نِت اِݜقَلِی اِیتِنکا وِے بو ضَرَر آئے چُمبَان۔ دا وِے خُشَان نُوما دُلسن ڎُومبَم کا اِیلجا دِیشُمبَان۔

 اَکِھیلچُو مِنیَاہَݩ دِیمِیَلومبَان کہ فَلانے یئے یا ایئی گَن ݜَوَنے مُوڎُومبَم ،وِے غا اِݜقَلِی اِیچا اِیلجا دُوڎِن نوخۃ۔ دا وِے دُولَشُو اَکِھݜٹَرو بَرِݩ اِیچُم ڎِک سِیمبَان۔ تے کاٹ کاٹ دُوخنہ کا گِیࣷڅوم ڎِک، پُھوکَن دَغُم ھَرَنݩاَ دُوخنہ کِیانزغَرِے نِت پِھیࣷچہ گِیڅُوم ڎِک یا بَتَن یَٹہ قون دِیَاشہ تاوۡولہ نیگی ہِنگڎِے اوشوم ڎِک۔ ” دُوخنہ غا اُردووۡڵے دُوھنی دینا سیمبان۔ “

 پَنجَابُوڵےفَقِیرِیشُو دُوخنہ نِیگی بازارنݩاَن گُوڎَھرچُمبَان دَا سِس اوڎوم پیسہ دیہیمیاچومبان۔ می بتھنولے دوخنہ ھرنگا پھکن ملتݜ، پُھکن قِہقِر، دا دُوخنہ کیانز غَرِے نِت دُوخنہ گِیین کا وِری کہ ٹُوݩࣷٹَݩ نُومہ ݜِییلی وِری ڎُورُومدُوا۔