ارزاہِم یا پَرِ تیۡݩ دوسُک یَچُم ، دُیَشچُم یا اوۡ ہُویچُم سیمبان، می دڵہ خلفتِݩ خہ نیۡت (خاص کر) تھوئیچو خلیفہ فقیری کاوے غا سیم ڎیۡک کہ وے غا بخشندہ دُواۡ۔ وے پَرِ تیۡݩ دُویشچومان نوخہ وےۡ اُییک دُوسُم سیس بَم ۔ وے اَمیۡت دہوموۡرْچُمے (دُعا) کھَسپ دُولُم کاࣷ تے غہ ارزاہِم سیم ڎیۡک ۔ یسیۡن اُلےۡ بِٹَن میۡن کہ اَپم ، ٹُک ہن بِٹَن نیۡن بم ۔ نےۡ کہ نگِررُم دیم بم ۔ مگم ڎھور ہیۡک اَن نازبر کہ بِٹَن نیۡن بئی نوخہ دَ یڵم با۔ (دَمَناۡ ڵیۡل ،ڎھنا پھئݩ کہ)۔ یسیۡن اُلےۡ گُشِݩا بُٹ اوملْ چُم ڎیۡک ، دا وے پَرِتِݩ دُیشچُمےࣷ گندیۡ خلفا ارزاہِم ایچُم ڎیۡک۔

اَمیۡت ہالےۡ گُس مومڵُ ڵُو کہ، تے ہالے شامہ اُیاۡ دیࣷہ اُ لےۡ قَوۡ (اعلان )ایۡچُم ڎیۡک “اَکُھئݩ می ہالےٚ ارزاہِم ایۡتاس دُوا، تے گندِیۡ اختیاط ایۡتِݩ”، نوخہ ، ہو تے ہا اسورتالےۡ شام مَنیۡ کاࣷ یہ اُیُوۡ، دُڵس پڵس ہوࣷ ڵہ پھت اَئ اُوچُم ڎیۡک دا اُنویُو بُٹ اختیاط ایۡچُم ڎیۡک ، بوتُم پقو نِݜیࣷ خلفا، ہا دمن ڎُم دُغریۡشُم ڎیۡک کہ دہوموۡرْچُم یعنی ارزاہِم شورُوغ ایچن بے سا؟ ، ہو نےپھیۡچاۡ دوخنہ نِگیۡ ، ققیࣷرْ قیࣷر شُو کہ نُگُوۡ ، دہوموۡرْچُا دوہونیۡ کاۡ ایۡتیِ موۡ مومڵاس موملْ چُم ڎیۡک یعنی بےۡ ہوۡش میُم ڎیۡک ۔ ہو نے خلفہ تے ایلجیۡ وارے تیۡشک ییٹےنلْتسک لٹُکُریۡس کِشیۡ پھُشُم ڎیۡک ۔ دا تیۡشک توڵہ ٹک نیۡٹ چُھو تِکانیۡلْتاۡ پھت نیۡت ، ہو اییادوروۡ یعنی دوہومورْچُم شروغ نیۡت مو مڵا س دُوموغریشمیِ کہ دوۡ ننیۡ شترُو مہ مسلمان بان کہ کلمہ سیۡنِݩ۔ وے کلمہ سیۡنیۡن کہ یعنی مو مڵاس گُسےۡ کلمہ سیۡنُو کہ لیۡڵ منیِ کہ وے پَرِ تیۡݩ مسلمان بان۔ ہو نےۡ خلفہ وے غہ بلاش سیمی کہ مہ مسلمان بان کھموۡ ناچار بوتا تکلیف موچِھچُمان ؟ دیاشا مَیا ہا ڵہ نیۡیݩ۔

بشہ بشہ وے مَل اَن یعنی مُلْتن دُمرْچمان اگر وے مُلْتن دُمریۡن کہ ہو نے خلفہ ہا دمنا سِمیۡ دے اڅو ، دُو اَن بیۡسمیۡڵ ایۡتِݩ ! سیۡنی کا ہو ہوڵےۡ ہِݩ ڎے مَل اَن ، بُٹَر اَن یا برَن اَن بیۡسمیۡڵ نیۡت پھت ایۡتیۡن کا وے دیاشہ ڎھیࣷرمان۔ دا بشہ بشہ وے ترَڅ نِدیۡڵ اقَریۡسیۡن کہ ہو خڵفہ وےࣷ اوسملْچُمے کِھݩگا ج ایۡچُمی، دا غوسکی ٹٹس اَن نیۡت ہو تیࣷݜک سے مُش ییٹے نوس سیمی ،”مہ ڎھریۡم بانا بے مَموش ماسکرْچم ” ، سیۡنی کا ہو وے نومڵ ڎھیرمان، دا بشہ بشہ پَرِ تیۡݩ اَلْتن یا تے ڎُم بُٹ مَنیۡن کا وے پھُکن بُٹ کھیۡن ڎُھچُم بان، وئݩگہ خیۡلیِ دوۡہوۡناس مئُم دُواۡ۔ ہو تئی نیۡت خلفہ دہوموۡرْچُمِ زور ییٹے دا سیۡتےۡ مُش ایۡسکرْچُم اےۡ کھین منِیۡ کہ ہو وے دِیاشہ ڎھریۡم بان۔

وے بشہ بشہ شندور، چمر کھن یا چھݜی بر، تُھم تُھم متھن متھن جغا ڎُم مئُم بان ، مگم وے دِیاشہ گڵیۡن کا ، ہیۡک دمہ اُیا کھن ڎھے ڈِس مئُم بان، دا وے اُیا ہِݩ اُولِیکڵ ڎہ، گڵیۡن نوخہ موۡ مومَڵاس سیۡنو کہ خلفہ وے غا سیم بئی ، کہ سلیمان پیغمبر یٹے تیۡݜ ایۡتِݩ کہ امَنہ غہ ائی ڎُھرَن۔ وے تیۡئن کا ہو خلفہ موۡ مومَڵاس موغہ سیمی کہ دروازہ ڎےۡ تَڵ وَشیۡ ، مو، ” تَڵ وشیہ ” سیۡنو کہ بس خلفہ “وا ٓخرو داوانا الحمداللہ ” یا “ربالعالمین” کاٹ ختم نیۡت دعا ایتیۡ کہ موۡ مومَڵاس کا ہُوشاۡ ڎُھرُم بُو۔ ہو خلفہ وے سَہف ہپاۡ غہ ” بُمبارک مَنیݜ!” سیمی ۔

موۡ مومَڵاسموۡ ہو کپل موۡ خوۡلِمیۡ ، مُووٹ موۡ خوۡلِمیۡ، ققہ چئ اَن یا چئ اَن مووۡ میۡن نیۡن کا ہو بس زرُخ مُمئُم بُوۡ۔ ۔ ہو خلص دا بوۡ